Un espectacular tramo final de competición conduciu ao onubense Emilio Martín ao subcampeonato do mundo de dúatlon na proba celebrada esta mañá en Pontevedra. O deportista español apelou a un infatigable espírito de loita para subirse á segunda praza do podio. Foi despois de asinar un heroico epílogo no que, despois de protagonizar un impresionante esprint final, superou case na liña de meta ao belga Angelo Vandecasteele, que acabou terceiro. O ouro foi para o francés Benjamin Choquert, que foi o gran dominador dos dous tramos de carreira a pé.
O 2019 ITU Pontevedra Multisport World Championships by Santander arrincou coas competicións de dúatlon, nas que os participantes fixeron fronte a un percorrido de 10 quilómetros de carreira, 40 en bicicleta e outros 5 a pé polas rúas da cidade galega. Na proba masculina, a primeira da xornada, os franceses Yohan Le Berre e Benjamin Choquert colocáronse de maneira inmediata na cabeza e, sen dar tregua aos seus rivais, chegaron á primeira transición cunha vantaxe de case un minuto sobre o grupo perseguidor, no que se achaban os españois Emilio Martín, Javier Martín, Luís Miguel Martín Berlanas e Antonio Benito.
O grupo perseguidor deu caza aos dous deportistas franceses no tramo en bicicleta e, despois da captura, formouse un grupo dianteiro composto por 21 unidades no que se asinou unha momentánea tregua. O británico Liam Lloyd rompeu as hostilidades para buscar unha aventura en solitario, pero uníuselle o nerlandés Thomas Cremers. Desta maneira, o desenlace quedou abocado ao último tramo de 5.000 metros a pé.
O francés Benjamin Choquert deu entón un golpe de autoridade para rematar coa resistencia de todos os seus rivais. Por detrás, o belga Vandecasteele mostrou a súa candidatura á medalla de prata, pero entón apareceu a figura do veterano Emilio Martín, bicampión mundial, que, tras selar unha memorable remontada, adiantou ao deportista belga xa no estadio para saborear unha segunda praza que lle soubo a gloria.
Despois de selar a medalla de prata, Emilio Martín non ocultou a súa satisfacción polo resultado acadado en Pontevedra. “Os franceses saíron a ritmo de tolemia no primeiro tramo, pero soubémonos entender para atrapalos. No último quilómetro e medio da proba, vinme moi forte e puiden conseguir a prata, que asinaría cos ollos pechados tras ver como foi a carreira”, comentou o deportista español. “Parte desta medalla é para a xente de Pontevedra, que me axudou nos momentos duros que pasei no últimos cinco quilómetros a pé”, concluíu.
Tras subirse ao máis alto do podio na competición masculina, Benjamin Choquert asegurou sentirse “moi feliz” pola vitoria. O deportista francés, que xa se proclamou subcampión de Europa en 2018, logrou o seu primeiro título mundial en terras galegas e expresou que “foi moi bonito competir nunha cidade como Pontevedra, que está envorcada coa competición e que nos arroupou durante os momentos máis duros da proba”.
ARNAUD MENGAL, VENCEDOR EN CATEGORÍA SUB-23
O belga Arnaud Mengal fíxose co título mundial de dúatlon en categoría sub-23. Avantaxou en nove segundos ao seu compatriota Arnaud Dely, mentres que o holandés Thomas Cremers logrou a terceira praza.
Texto: Federación Española de Triatlón
www. pontevedra2019.org/itu
